ملتقى طلبه اولي طب بشري 2011/2010

السلام عليكم ورحمه الله وبركاته
تحيه طيبه لهذا المنتدي الرائع وجميع القائمين عليه وفقهم الله لما يحبه ويرضاه وبعد
انا محمود اولي طب المنيا ان شاء الله هذا العام 2010/2011
وقد قرات الكثير والكثير عن هذة الكليه الجميله وقد ذاد شوقي اليها بعد ما كانت بالنسبه لي اضغاث احلام لكن الحمد لله الذي رزقني اياها
ولكن بعد ما سعدت بنعمه الله تحولت هذه السعادة الي قلق وتوتر وربما خوف لا تتعجبوا لماذا ؟؟؟ ساخبركم
بعد قيل لي ان هذة الكليه صعبه وربما من اصعب الكليات وتحتاج الي جد وكد لا متناهي ((خاصه ونحن ما صدقنا اننا خلصنا ثانوي عام بعنائه وتعبه))قلقت كثيرا خاصه وبعدما قيل لي انها لا تعتمد علي الفهم مطلقا وانها حفظ في حفظ وعلي لسان احدهم ((تحفظهم صم وتدخل تكبهم في الامتحان)) وانا لا استطيع الحفظ الا بعدما افهم ورغم اني مرتفع الذكاء والفهم الا اني سئ الحفظ)) فقد قررت في انشاء هذا الموضوع لاخذ خبرات سابقة من حضراتكم اعزكم الله كما انها فرصه للتعرف علي طلبه اولي طب 2010/2011 لا طب المنيا فقط بل من جميع كليات الطب ((خاصه وانهم الطلبه وانا معهم الذين تعرضنا لهجوم شديد من الكل باننا الدفعه ((للاسف المتخلفه)) وكيف نثبت للكل اننا ليسوا كذلك وربما يخرج الله من بيننا علماء لنتشاطر الافكار التي تدور ببالهم ولنتحدث عن استعداد كل منهم للكليه ومخاوفه ونتناقش حولها ويطرح كل منا اسألته واستفساراته وان شاء الله ربنا يرزقنا باحد الزملاء الاكبر ممن لديهم الخبره ليجيبوا عنها ونعرف طموحات كل منا واي تخصص يطمح اليه ولماذا ما هو سبب اختيارة وسأبدا بنفسي انا حقيقه لا اعرف اي تخصص اريده لكني متحير بين بعض التخصصات وهي الباطنه والاطفال والمخ والاعصاب والقلب والجراحه (بس شوفتوا انا قنوع ازاي) خصوصا وان هناك تخصصات انا بميل اليها جدا مثل المخ والاعصاب الا ان بعض الاطباء حذروني من ندرا مجال العمل فيها
بصراحه محتار جدا (( والغريبه رغم ان هذا التخصص بعد عمر طويل اووووووووووي 7 سنين الا اني شغوف جدا باختيارة من الان))
وعن استفساراتي التي اتمني ان احد الاخوة الطيبين ان يجيبوني عليها هيا
العلماء الاجانب ممن يدرسون الامراض الحديثه مثلا كانفلونزا الخنازير ويكتشفوا لها علاج وامصال وادوية ولاي امراض اخري هل ايضا يتخرجوا من كليه الطب وما هو الطريق لنصبح مثلهم ان شاء الله ؟؟
واما عن استعداداتي للكليه لاول مرة في حياتي كالعادة اشتريت لبس جديد كتير اووووي وموبايل جديد ولاب توب ((ما هو طب يا اخونا ))
وجهاز الضغط الالماني وسماعة امريكي مش فاكر اسمها فيه حروف التي والان كدا تيتان او حاجه زي كدا(( بالرغم من ان بائع شركه الادوات الطبيه قال لي -ما هي الاجهزة بتبقي اصليه لكن الدكتور بيبقي صيني-))؟؟!! ولم اعرف ارد عليه وجهاز السكر علشان تكتمل العده كدا ما ناقص غير حاجه واحده المريض فين ؟؟؟
ده انا كمان اتعلمت اشتغل ع الاجهزة دي ومسافر اشتغل في السعوديه ((ببطاقه الترشيح)) حد عاوز يجي معايا اللي عاوز يجيب بطاقه الترشيح فقط
شكرا وجزاكم الله خيرا ونتمني مشاركتكم وتواصلكم
شكرا وجزاكم الله خيرا




أهلا وسهلا ً أخويا دكتور محمود أنا داخل سنة اولى ان شاء الله طب عين شمس

طبعا كلنا تعبنا في ثانوية عامة و عانينا عناء كبير جدا عشان نوصل لكلية الطلب ....
اعذرني ... كذب من قال إن الطب كله حفظ ... بكل بساطة العقل البشري لا يستطيع أن يحفظ شيء وهو غريب عليه و غير مفهوم ..لذلك من قال لك ان دراسة الطب كلها حفظ فهو مخطئ ...... وعشان تطلع دكتور ناجح يبقى لازم تكون جايب تقدير حلو ولو انت عايز تجيب تقدير حلو يبقى لازم تذاكر صح .. والي قالك إنك هتحفظ وتكب في الامتحان ده غلطاان جدا حرااام .. ده انت دكتور .. يعني مفيش حاجة اسمها ثانوية عامة لما اخلص الامتحان يبقى خلاص انسي كل حاجة متعلقة بالمادة الي امتحنتها .. لالا ده معلومات هتستمر معانا طوال ايام حياتنا ...... ^^


الطب لعبة جميلة جدا وممتعة والله لو احنا شوفنها كدة هيا هتبقى كدة وطبعا ساعات هنتعب ونتوتر و تسود الدنيا في وشنا ونلاقي نفسنا مش فاهمين لكن بالهدوء و اخد راي الأكبر منا كل حاجة هتبقى تمام خالص ان شاء الله .....

... كل الطلبة اولى الدراسة هيلاقوا نفسهم ضايعين وده شعور عادي وطبيعي كل الطلبة اتعرضوا ليه واحنا كمان هنتعرض له يعني مفيش قلق خالص .. والشعور ده ممكن يستمر لمدة شهر أو أكتر لكن بعد كدة هنلاقي نفسنا أحسن إن شاء الله ...

بالنسبة لأننا الدفعة الفاضية و المتخلفة كما قيل عنا ... فاكبر دليل .. على اننا عكس ذلك هو ان هناك طلبة كثيرون دخلوا كليات قمة ... والحمد لله يعني الامر ده مفروغ منه وان شاء الله المتميز منا هيثبت نفسه للناس ...........

بالنسبة للمواد الي هندرسها سنة اولى ان شاء الله :

anatomy انتومي يعني تشريح
histoligy هيستولوجي وده علم الانسجه
physiology فيسيولوجي علم وظائف الأعضاء
biochemistry بيو كميستري وده الكيمياء الحيوية و فيها كل التفاعلات الكيمياية الي بتحصل في الجسم و التركيب الكيميائي لمواد الجسم وكدة

... طبعا انت هتقولي انا جبت المعلومات ده منين ^^ أنا أخويا في سنة رابعة طب وهو قالي الكلام ده ..... ^^


نصيحة لوجه الله .. لا تستمع لقول أي شخص يقلقك او ما شابه ذلك توكل على الله ووان شاء الله ربنا يوفقنا ............

أنا نفسي بجد كل طلبة سنة اولى الي معانا يدخلوا هنا وكله يقول هو قلقان من ايه و كلنا نساعد بعض ^ __^ ويكون ده ملتقى لينا هنا والموضوع ده يتثبت عشان يكون امام عيون الكل .....