منتدي التربيه التعليم
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

منتدي التربيه التعليم

منتدي التربية التعليم تخصيص عن مذكرات مراجعات جميع الصفوف التعليم الابتدائية الاعدادية الثانويه الازهري الجامعات
 
الرئيسيةأحدث الصورالتسجيلدخول

 

 اشمعنى أنا !!! ربنا ما هدانيش !!!

اذهب الى الأسفل 
كاتب الموضوعرسالة
Admin
Admin



المساهمات : 310
تاريخ التسجيل : 24/05/2011

اشمعنى أنا !!! ربنا ما هدانيش !!! Empty
مُساهمةموضوع: اشمعنى أنا !!! ربنا ما هدانيش !!!   اشمعنى أنا !!! ربنا ما هدانيش !!! Icon_minitimeالأحد مايو 29, 2011 1:23 am

اشمعنى أنا !!! ربنا ما هدانيش !!!

عمرك ما سألت نفسك السؤال دا

إنت بالذات

اشمعنى ربنا ماهداكش !

فاكر الجروب بتاعك

كان فيه صاحبك دا

يا سبحان الله دلوقتي بقى شيخ

لحيته منورة وشه

الخمس فروض في الجامع

ساب الحاجات اللي كنا بنسمعها

و بقى بيحفظ كتاب ربنا

اشمعنى انتِ

لسة كدا و لبسك عامل كدا

فاكرة صاحبتك اللي كانت زيك كدا بالظبط

دلوقتي لبسها واسع و سابت فلان اللي كانت بتحبه

و بقت تحفظ قرآن و بقت تكلم الناس عن ربنا

اشمعنى انت و انتِ لسة كدا

عايز تعرف السبب ؟؟

يبقى نكمل كلام و خاليك معاي للآخر

عشان تعرف إشمعنى إنت



سمعت الحديث دا قبل كدا

قال رسول الله صلى الله عليه وسلم :

ضرب الله تعالى مثلا صراطا مستقيما ، وعلى جنبتي الصراط سوران ، فيهما أبواب مفتحة ، وعلى الأبواب ستور مرخاة ، وعلى باب الصراط داع يقول : يا أيها الناس ! ادخلوا الصراط جميعا ولا تتعوجوا ، وداع يدعو من فوق الصراط ، فإذا أراد الإنسان أن يفتح شيئا من تلك الأبواب قال : ويحك لا تفتحه ، فإنك إن تفتحه تلجه ، فالصراط الإسلام ، والسوران حدود الله ، والأبواب المفتحة محارم الله تعالى ، وذلك الداعي على رأس الصراط كتاب الله ، والداعي من فوق واعظ الله في قلب كل مسلم

صححه الألباني

الطريق دا هو الإسلام

و الحمد لله ممكن نسبة 99.9 في المية من اللي بيقروا الموضوع دلوقتي مسلمين

السورين اللي على جانبي الطريق دول حدود الله

الأبواب المفتوحة محارم الله تعالي اللي ما ينفعش تدخلها أو تتخطاها

و رأس الصراط هو القرآن اللي بيناديك و يقولك كمل على الطريق

ما تبعدش ماتحيدش يمين و شمال

و في داعي من قلبك اللي بيعظك هتلاقي نفسك بتسمعه و انت جاي تعصي لأن ربنا رزقك الإسلام

طيب ما انا و صاحبي مسلمين يعني برضه اشمعنى هو ربنا هداه
!!

قولنا خاليك معايا للآخر

الطريق اللي هو الإسلام المفروض ان آخره الجنة

و القرآن هو الواعظ اللي طول الطريق بيرشدك عشان تدخل الجنة

و في سورة في القرآن تعدل القرآن كله

و هي سورة الفاتحة

الفرق بينك و بين صاحبك هي سورة الفاتحة



إنت أكيد بتهزر ! الفرق بيني و بين صاحبي سورة الفاتحة !
دانا حافظها من و انا طفل صغير


برضه خاليك معايا للآخر عشان تعرف الفرق الحقيقي اللي كان بينك و بين صاحبك في سورة الفاتحة


سورة الفاتحة من السور العظيمة في القرآن


أقل حد انت بتقرأها في اليوم 17 مرة دا إذا انت بتصلي الفروض بس


يعني بتقولها أكتر من اسمك


و مع ذلك صاحبك فرق عنك في ازاي بيقرأ سورة الفاتحة


سؤال


عارف سورة الفاتحة معناها ايه ؟؟


آه طبعا دا حتى كلماتها سهلة وواضحة


يا راجل

طيب يعني ايه الحمد ؟؟ و إيه الفرق بين الحمد و الشكر ؟؟


و يعني ايه رب ؟؟


و يعني ايه العالمين ؟؟


بس برضه مش فاهم ايه علاقة دا بسبب هدايتي


هقولك ايه العلاقة و بعدين نبدأ نتكلم ليه لازم تبقى فاهم معنى سورة الفاتحة


و ركز في الحديث دا بقلبك


عن عبد الله بن عباس قال :

بينما رسول الله صلى الله عليه وسلم وعنده جبريل عليه السلام ، إذ سمع نقيضا فوقه ، فرفع جبريل عليه السلام بصره إلى السماء ، فقال : هذا باب قد فتح من السماء ما فتح قط ، قال : فنزل منه ملك ، فأتى النبي صلى الله عليه وسلم فقال : أبشر بنورين أوتيتهما ، لم يؤتهما نبي قبلك ؛ فاتحة الكتاب ، وخواتيم سورة البقرة ، لم تقرأ حرفا منهما إلا أعطيته


صححه الألباني


الشاهد هنا لم تقرأ حرفا منهما إلا أعطيته


طيب ما كلنا بنقرأ سورة الفاتحة و زي ما قولنا أقلها 17 مرة في اليوم


و بنقول كل مرة اهدنا الصراط المستقيم


ليه في مسلم طائع ع الطريق و في حد تاني عايش حياته مصاحب فلانة و بيسمع أغاني فلان و هي لسة لبسها ضيق

و بيصلوا !


طيب إزاي و احنا وعدنا بالإجابة

هو دا بقى الفرق بينا كلنا

في حد و هو بيصلي فاهم سورة الفاتحة و في حد تاني تحولت صلاته إلى عادة و ليست عبادة

بيقول و مش حاسس هو بيقول ايه

إن كان فاهم أصلا هو بيقول ايه

و فاكرين كلام النبي صلى الله عليه وسلم :

ادعوا الله وأنتم موقنون بالإجابة واعلموا أن الله لا يستجيب دعاء من قلب غافل لاه


هو دا الفرق الإحساس - الفهم - و اليقين


لذلك ان شاء الله هنعيش مع سورة الفاتحة كلمة بكلمة في الموضوع دا


و نعيش مع معانيها حتى نكون على الصراط المستقيم بجد

تابعونا....
الرجوع الى أعلى الصفحة اذهب الى الأسفل
https://ahla.forum.st
Admin
Admin



المساهمات : 310
تاريخ التسجيل : 24/05/2011

اشمعنى أنا !!! ربنا ما هدانيش !!! Empty
مُساهمةموضوع: باقي الموضيوع   اشمعنى أنا !!! ربنا ما هدانيش !!! Icon_minitimeالأحد مايو 29, 2011 1:27 am




السلام عليكم و رحمة الله و بركاته

ازيكم يا شباب

اتكلمنا المرة اللي فاتت عن سبب خفي جدا

ليه في ناس حياتها بتتغير و ناس لأ

و توصلنا إلى أنه ممكن تكون سورة الفاتحة

اذا لسة في ناس مش مصدقة أو مش مقتنعة

نقنعهم !

قال الله تعالى في الحديث القدسي

يا عبادي كلكم ضال إلا من هديته فاستهدوني أهدكم

و دا بالظبط اللي انت بتعمله في سورة الفاتحة

17 مرة في اليوم بتقول للملك

اهدنا الصراط المستقيم

يعني بتستهدي الله فيهدك الله

و اذا قلتها بقلبك تيقن بأنك مجاب

غير كدا و الأعظم انك و انت بتقرأ سورة الفاتحة في حوار بينك و بين ربنا

قال تعالى في الحديق القدسي

قسمت الصلاة بيني وبين عبدي نصفين . ولعبدي ما سأل . فإذا قال العبد : الحمد لله رب العالمين ، قال الله تعالى : حمدني عبدي . وإذا قال ؛ الرحمن الرحيم . قال الله تعالى ؛ أثنى علي عبدي . وإذا قال مالك يوم الدين . قال : مجدني عبدي ( وقال مرة : فوض إلي عبدي ) فإذا قال : إياك نعبد وإياك نستعين . قال : هذا بيني وبين عبدي ولعبدي ما سأل . فإذا قال : اهدنا الصراط المستقيم صراط الذين أنعمت عليهم غير المغضوب عليهم ولا الضالين . قال : هذا لعبدي ولعبدي ما سأل

و الحديث في صحيح مسلم

ركز هنا لما قلت إياك نعبد و إياك نعبد

قال الله بيني و بين عبدي
و لعبدي ما سأل

لما قولت اهدنا الصراط المستقيم صراط الذي أنعمت عليهم غير المغضوب عليهم و لا الضالين

يقول تعالى : هذا لعبدي و لعبدي ما سأل

سبحان الله شرف و الله ربنا بيرد علينا




طيب احنا كنا قولنا ليه طيب في ناس بتمشي في الطريق و بتنتكس ! أو حتى - نعوذ بالله- يخرج من الإسلام حتى

مش هنروح بعيد ليه في ناس مش عارفة تلتزم بتعاليم ربنا طالما كل الفوائد دي من إجابة الدعاء في هذه السورة

قولنا الحل كان في 3 حاجات

الإحساس - الفهم - اليقين

و الإحساس و اليقين مش هييجوا غير بالفهم

لازم تبقى فاهم كل كلمة بتقولها

تعالوا نتكلم عن فضل هذه السورة العظيمة

طبعا غير اللي قولناه فوق

حديث أبو سعيد بن المعلى

أبو سعيد بن المعلى كان واقف بيصلي

فدعاه النبي صلى الله عليه وسلم و هو بيصلي

فأبو سعيد لم يجب النبي صلى الله عليه وسلم

و بعد لما خلص صلاة راح للنبي صلى الله عليه وسلم

فقال له رسول الله صلى الله عليه وسلم : ما منعك أن تأتي

فقال أبو سعيد كنت أصلي

فقال رسول الله صلى الله عليه وسلم :

ألم يقل الله : { يا أيها الذين آمنوا استجيبوا لله وللرسول إذا دعاكم لما يحييكم } .

ثم قال : ( ألا أعلمك أعظم سورة في القرآن قبل أن أخرج من المسجد ) .

فذهب النبي صلى الله عليه وسلم ليخرج من المسجد فذكرته ، فقال : ( { الحمد لله رب العالمين } . هي السبع المثاني ، والقرآن العظيم الذي أوتيته ) .


و الحديث في صحيح البخاري

ركز في الآية

إذا دعاكم لما يحييكم

هو أبو سعيد مكانش عايش !

لأ كان جسديا عايش

و لكن الحياة هنا حياة القلب و حياة الروح

حياة الإيمان اللي هي أهم من حياة الجسد

و الحل عشان نعيشها كما في الآية

استجيبوا لله و لرسوله صلى الله عليه وسلم

في الأوامر و النواهي



المهم وضح له النبي صلى الله عليه وسلم في الحديث أن أعظم سورة في القرآن

هي الفاتحة

فياللا بينا نعيش سوى مع أعظم سورة في القرآن الكريم



قبل ما بنبدأ نقرأ القرآن عامة

أول حاجة بنعملها

الاستعاذة

يعني بتقول : أعوذ بالله من الشيطان الرجيم

يعني ايه ؟؟

أي ألجأ و أستجير و استعصم بالله من الشيطان الرجيم

فانت و انت بتقولها لازم تحس المعنى دا بقلبك

يا رب بلجأ و أستجير بك من وساوس الشيطان

حكم انك تقول أعوذ بالله من الشيطان الرجيم قبل القراءة هو سنة و الا فرض

عليها خلاف و لكن الأكثرية على انها سنة

بس شايف هي مهمة قد ايه

انك بتلجأ إلى الله من الشيطان الرجيم

اللي هيحاول أكيد يخليك ماتركزش في القراءة و يشغلك بحاجات تانية

بل و ممكن تلاقي نفسك بتوصل لحلول لمشاكلك و انت بتصلي أو بتقرأ قرءان

و دا طبعا لأن الشيطان يكره و يمقت أنك تعيش مع القرآن

فمن هنا ورايح و انت بتقولها

تحس بمعناها

اللهم إني ألجأ و أحتمي و أستجير بك من الشيطان الرجيم

اتفقنا ؟



بعد كدا بتقول

بسم الله الرحمن الرحيم

شوف المعاني اللي ممكن نطلع منها من البسملة

أولا البركة بذكر اسم الله

عموما في الاسلام من السنة انك تقول باسم الله قبل أي عمل تقوم به

ليه بقى

أولا دا بيذكرك بالنية بل و يصلح نيتك في العمل اللي هتقوم بيه

يعني مثلا ممكن واحد جاي يولع سيجارة يقول باسم الله ؟؟

أكيد لأ

لأن ذكر الله هيمنعه و هيحسسه بأن اللي بيعمله دا غلط

فيتوقف عنه

تاني حاجة مهمة انها هتحول عاداتك إلى عبادات

لأنك ذكرت اسم الله

البسملة عامة فيها صيغة الحصر

يعني مثلا بتقول باسم الله قبل الأكل

معناها اللغوي

لا آكل باسم أحد متبركاً به، ومستعيناً به، إلا باسم الله عزّ وجلّ

معنى جميل أوي

فدلوقتي المطلوب مننا بعد ما اتعلمنا معنى البسملة

أولا هتاخد أجر على ذكرك اسم الله
ثانيا : انك فعلا مش مستعين إلا بالله في العمل اللي ذكرت اسم الله عليه
ثالثا: هتحول العادة إلى عبادة
رابعا: هيذكرك بنيتك فإن نويت معصية مثلا ذكرك لله هيوقفك عنها

اتفقنا ؟



نبدأ مع أول آية من سورة الفاتحة

الحمد لله رب العالمين

يعني ايه الحمد ؟؟؟

أولا حتة لغة عربية كدا (معلش استحملني )

ال التعريف اللي في بداية الحمد

يعني قمة الحمد

الحد الأقصى

معنى الحمد :

وصف المحمود بالكمال مع المحبة، والتعظيم؛ الكمال الذاتي، والوصفي، والفعلي؛ فهو كامل في ذاته، وصفاته، وأفعاله

مش فاهم حاجة !!

بالراحة كدا

الحمد يعني انك بتوصف ربنا بالكمال

كمال في ذاته و أفعاله و صفاته

ليس كمثله شيء

لكن بشرط

مع المحبة و التعظيم

لأن الفرق اني أوصف حد بالكمال من غير حب دا اسمه مدح

لكن احنا بنحمد ربنا على كماله بحب

طيب ايه الفرق بينه و بين الشكر :

العلماء قالوا ان الشكر يتطلب النعمة

يعني ربنا رزقك نعمة فتشكره

لكن الحمد انك بتوصف ربنا بالكمال لأن ليس كمثله شيء

نوضح أكتر

ممكن صاحبك يوصلك مثلا البيت بالعربية يعملك خدمه انت محتاجها
هنا هتشكره

لكن مثلا كنت قاعد في مكان فجبتم سيرة خالد صاحبكم و بدأتوا تقوله آه ما شاء الله دا انسان طيب جدا و أخلاقه عالية سواء كان خالد عملك خدمة أو لأ
هنا انت مدحته

فالحمد بقى زي المدح لكن مع الحب و التعظيم

الله : لفظ الجلالة
و اسم الله لا يطلق إلا على الله

و معناه المألوه أي المعبود حبا و تعظيما

و المعنى دا يحقق في قلبك الإخلاص
اللي شرط أساسي في قبول العمل
يعني انا ما بعبدش غيرك يا رب
حبا و تعظيما لك

يعني دلوقتي و انت بتقول الحمد لله

كأنك بتمدح ربنا على كماله و كمال ذاته و صفاته و أفعاله مع الحب و التعظيم
فهو إلهك الذي تعبده و تعظمه و توجه أعمالك كلها إليه

معنى جميل جداا حاول تستشعره و انت بتقرؤه كل مرة

رب العالمين

كلمة رب باللغة العربية ( و قولتلك استحملني )
معناه
مالك

زي مثلا رب البيت
أو رب العمل

و لكن الرب بأل التعريف
تطلق على الله فقط

خالي بالك من المعنى دا

و الرب هو من اجتمع فيه ثلاث صفات
الخلق
الملك
التدبير

يا سبحان الله لما تيجي نقرأ الآية و تقول رب العالمين
يعني يا خالقي و مالكي و مدبر أمري

و هتلاقي مثلا في القرآن ان الرسل لما كانوا بيدعوا ربنا سبحانه و تعالى بيقولوا

ربِ

قال تعالى

وَإِذْ قَالَ إِبْرَاهِيمُ رَبِّ اجْعَلْ هَـٰذَا بَلَدًا آمِنًا

هُنَالِكَ دَعَا زَكَرِيَّا رَبَّهُ قَالَ رَبِّ هَبْ لِي مِن لَّدُنكَ ذُرِّيَّةً طَيِّبَةً إِنَّكَ سَمِيعُ الدُّعَاءِ

رَبِّ هَبْ لِي حُكْمًا وَأَلْحِقْنِي بِالصَّالِحِينَ ﴿الشعراء: ٨٣﴾

و آيات كتير جدا اذا بحثت في القرآن عن صيغة دعاء الأنبياء

ركز فيها من هنا و رايح في وردك

فانت بعد كدا و انت بتدعي ربنا سبحانه و تعالى

استشعر معنى الربوبية

يا خالقي و يا مالكي و يا مدبر أمري

فدعاءك يزيد يقين ان ربنا هيصلحلك أمرك لأنه يعلم ضعفك لأنه خالقك و انه هيدبرلك أمرك لأنه ربك

و الربوبية بتنقسم قسمين

ربوبية عامة و دي للخلق جميعا

و ربوبية خاصة و دي للمؤمنين

انه يصطفيهم و يحميهم و دي لعباده الطائعين

ربنا يجعلنا منهم

العالمين :

حتة عربي تاني

جاية من كلم علم

قال العلماء: كل ما سوى الله فهو من العالَم

يعني أي شيء سوى الله فهو يندرج تحت كلمة العالمين

سبحان الله شوف كمية المعاني اللي طلعنا منها من آية واحدة بس

الحمد لله رب العالمين

و عشان مانتوهش

ايه المفروض أحسه بعد كدا و انا بقرأ الحمد لله رب العالمين

يا رب انا أثني عليك لكمالك و كمال صفاتك و أفعالك و قلبي يملؤه حبا و تعظيما لك يا مدبر أمري و مالكي و خالقي و رب كل شيء

و استشعر جدا معنى كلمة ربي بعد كدا و انت بتسأله

و الله لن تجد إلا خيرا

نكمل المرة الجاية ان شاء الله
الرجوع الى أعلى الصفحة اذهب الى الأسفل
https://ahla.forum.st
 
اشمعنى أنا !!! ربنا ما هدانيش !!!
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدي التربيه التعليم :: عاوز تعرف دينك؟ يلا بينا :: حى على الفلاح-
انتقل الى: